إنتصار الشعر

ماكل مايكتب من الشعر موزون=ولاكل من يدرس بالاوزان شاعر
الشعر حبك وسبك وابداع وفنون=واحساس شاعر مايجي بالمهاتر
وقاف(ن) على الابيات راهي ومقرون=وفكره بها يكمل نتاج المشاعر
ياهيه ياهل اللوك بالهون بالهون=عمر الحباري ماتروم المواكر
والله لو جيتوا علينا ترليون=أنتم كما سرب الجراد المهاجر
غير النبات من الوطا ماترومون=ولا الشجر يبقى ولو مايحاذر
سلطكم الله فالقصايد تلوكون=والشعر يبرى من ركيك المصادر
عن دربكم جنب أبو عقاب سعدون=والشن والنجدي كثير النوادر
والشيخ ابن هذال في شعره عيون=ياما تغنوبة ربوع التسامر
والشيخة اللي قالها تطرب الكون=عين القصيد وكل رجال خابر
وأبا الشيوخ ونسل وايل يعرفون=ابن المهيد اللي قصيدة تفاخر
وأيضاً ابن حثلين وبندر وبن عون=وشالح وبن لعبون والعلم ظاهر
والجنق وبن حميد ودهام يردون=عد القوافي ... وردهم عد طاهر
وذاك الوضيحي في وصوف الرمك نون=حتى الشريف وإبن هادي الجحادر
لو جيت ابجمع جمعهم وش تشوفون=غير النجوم اللي تسر النواظر
وأنتم عن كتاب التواريخ تقفون=شي(ن) عليكم صعب ياهل الخواطر
حكم المحاكم مايجي عند ملسون=ولا عمر فاز اللي يجيد التآمر
الحق حق ولو تقولون .. تبطون=لابد مايظهر عزيز المظاهر
آمنت باللي لا أمر كن ..بيكون=وشلون كلن صار بالشعر شاطر
ناس(ن) خذوا همه وناس(ن) يهيمون=وناس(ن) لجل حفظه تشف المحابر
وناس(ن) يسرونه مع الليل مغبون=ياوجد حاله من حصيل المطامر
وناس(ن) يجيبونه كما الدر مكنون=شي(ن) يسر النفس .. والعقل حاضر
ياوجد حالي وجد من كان مسجون=خلف الحديد ايديه .. والوقت غابر
حده زمانه يوم نسله يعيلون= في جارهم من دون حد التجاور
يوم اذبحوه وشاف وشهم يسوون=قال إرحلوا حلت علينا الدواير
خذوه ... حكم إعدام والناس يدعون=دم الذي يسطي على الجار ... حادر
باروا به عياله ولاجوه يمشون=في وسط سجنه وحدته ماتغادر
هي حيلته .. دعوه ..إذا الناس يمسون=على عياله ... مابقى به يكابر
وجدي على اللي سافح(ن) دمع العيون=وارهى على طعوني فتيل الذخاير
غرو(ن) نحيل العود فتان مزيون=رعبوب هيف القد ردَاف ظامر
أكحل فجيج النحر وحجاج مقرون=أجبه خديد أوجان مترف وخادر
أحور ... سلاح العين فالجفن مركون=صف الرماح السود حول المحاجر
أفتل يدين(ن) كنها جذع زيتون=توه على منشاه والوسم ماطر
أعنق...كما ظبي(ن) سكن حد طعنون=جفول ريع متَرس(ن) بالدوامر
أشقر شقار العملة اللي يسكَون=في تركيا يوم العرب ماتهادر
أقفى ولا يدري وش اللي يحيكون =حبه..وشوقي له..وقلب يعاذر
في حق عيني..والسهر والشقا ظعون=وفي حق كوعي والقلم والدفاتر
أقفى وخلاني على الحيف مطعون=مضمي محيل (ن) مخلي(ن) فالهواجر

صـــــح لسانك

يعطيك الف عافيه

كل الشكر والتقدير

سلمت ولا عدمناك

ننتظر جديدك

صح لسانك

الشكر لكل من أكرمني بمرورهـ الغالي

السلام عليكم ورحمة الله وبركاته

هذه القصيدة لي أنا الشاعر فيصل العنزي

وقد نشرتها في كذا موقع ومنها موقع الشاعر ناصر الفراعنة

وانت هنا تسرقها وتضعها بإسمك

عجبا ً ,, أتمنى من الادارة حذف ماقمت بسرقته

ولاتضرب بسيف مهو لك

فيصل العنزي

أتمنى منك أخي إعطا إدارة المنتدى ما يثبت
عن طريق قسم الشكاوي والإقتراحات
ليتم إضافة منقول واسم شاعر القصيده

القصيده منذ أمد بعيد

وقد يكن الشاعر غير متواجد الأن بيننا
مرحبا بك

سوف تقف الاداره على الحقيقه ولن نقبل تجريح او تجاوز لا احد

حياك الله اخى العنزي